Rëndësia e Rregullimit dhe Zbatimit të Transparencës Financiare të Partive Politike në Shqipëri

Partitë politike konsiderohen si guri i themelit të demokracisë,  duke ndihmuar  në garantimin e ekzistencës të një qytetarie të mirë-informuar dhe të angazhuar. Financimi publik dhe privat është thelbësor që partitë politike të mbijetojnë, të konkurrojnë në mënyrë të drejtë dhe të kryejnë funksionet e tyre demokratike, si gjatë fushatave zgjedhore ashtu edhe ndërmjet tyre. Megjithatë, përfshirja e parasë në sistemet e partive politike dhe në fushatat zgjedhore sjell gjithashtu rreziqe serioze si korrupsioni dhe ndikimi i padrejtë.[1]Transparenca është jetësore për të zbutur rreziqe të tilla.Financimi i partive politike i referohet rolit të parasë në politikë, fenomen i cili përfshin një gamë të gjerë veprimtarish dhe rolesh[2]Përkatësisht praktikat financiare të partive politike – mbledhjen e fondeve, shpenzimet, raportimin dhe paratë e fushatës[3]. Problemet e financimit të partive politike shpesh ndeshen në dy drejtime: gabime të ligjvënësit dhe gabime të rregullatorit. Ky shkrim do të identifikojë çështjet që lidhen me transparencën financiare të partive politike në Shqipëri dhe do të nxisë diskutime të mëtejshme rreth kësaj teme e cila mbetet ende pak e trajtuar. Për këtë qëllim do të analizojmë zhvillimin e kuadrit rregullator shqiptar në lidhje me financimin e partive politike duke u fokusuar në mangësitë ligjore dhe mospërputhjet midis ligjit dhe praktikës, dhe pastaj do të diskutojmë në përgjithësi ato elemente të cilat janë identifikuar nga ekspertët si sfidat e përbashkëta të legjislacionit mbi financimin e partive politike dhe zbatimin e tij.